Psa 52 | MMX | STEP | Nu laradi silok, tila um simi u at laxapmek taram, la mumu bok mo lempanga xapmek uk lox i ri limixin at ne Moroa?

Psalms 52

Loklok Amokso Mi Labalamu At Ne Moroa

1 Nu laradi silok, tila um simi u at laxapmek taram, la mumu bok mo lempanga xapmek uk lox i ri limixin at ne Moroa? 2 U gagas li leventaangas ti lok kapmek leventaba vetpes; levelinga ram ing sengsen ngan loxonise. Nenu u puse ngas amisik ti xaxarang. 3 Nenu u vavara aleng ti laxakapmek la u ke xepe luvukat; u vavara aleng ti levelinga xaxarang la u ke xepe levelinga ruturun. 4 Nenu laradi xaxarang, u vavara aleng do unak lox asongot mene limixin mi laxalinga xaxarang taram! 5 Kuren la ne Moroa noxo xap ti lok kapmek amisik tino u; ni ba ranga alis ka u la ni naba saksu minu basinge loogu ram; la ni naba lox axap tino lorooro ram la unoxo nemen bok ba at lemenemen at limixin di rooro. 6 Limixin mokmokso dinaba ven i na la dinaba lingun; la dinabang longon arup u la diba lok do, 7 “Mina ven ba na laradi goxo vara i do ne Moroa na lok tatao i. Ketla ni ga nuunu saga at lapnovos silok teren, la ga nunua i do loklok kakapmek naba lox aulis i.” 8 Ketla nenia a lok ngan luuna Olip i susu avukat to xeneng at loogu at ne Moroa; nia a nuunu saga at labalamu lexen teren naba nemen amisik la noxo xap. 9 Nia anaba tong loklok avukat amisik tu, ne Moroa, ti nom lavanga ugara lok pam i; nia anaba tong asu i do nenu u lox avukat to melamgo at limixin taram.